जा दिले मन तुला

जा दिले मन तुला कर त्याचे तू काही

दिले दान पुनः घेणे माझ्या स्वभावात नाही ॥धृ॥

फुल मनाचे खुडून दिले तुझ्या हातात

ठेव ओंजळीत किंवा सोड काळाच्या नदीत

देठ तुटल्या फुलाला भय निर्माल्याचे नाही ||१||

तुला द्यावे मन असे काही कारण नव्हते

एवढेच म्हणू आता तुझ्या नशिबात होते

पडे त्याच्या हाती दिवा ज्याला दिसतच नाही ||२||

मनाविण जगताना, वाटे मलाही बरेच

आता दुःख-बिख नाही वाटे आश्चर्य सखेद

मला एक मन भारी तुला दोन्ही जड नाही ॥३॥

जा जा जा दिले दिले मन तुला
कर त्याचे तू काही...
दिले दान पुन्हा घेणे
माझ्या स्वभावात नाही…

कवी - संदीप खरे