स्वप्न - गोडी

आता गोडी संपलीय
नित्यनेमाने क्षणोक्षणि
स्वप्न रंगवण्याची
तिच्या मिलनाची

पूर्वेला सूर्य वर येताना
सुखावतो वारा पश्चिमेचा
दक्षिणेचा लांबच लांब रस्ता
वाट पाहायला लावतो आनंद उत्तरेचा

क्षणात धुंद होते मन
शहारते माझे तन
पण नकोसं  वाटतंय
हल्ली तन-मन-धन

मोहरलेला समीर हा
आजकाल शहारत नाही
हिरवी शाल पांघरलेली
धरणीमाय हसतच नाही

रडतो उंच नभी
पौर्णिमेचा चंद्र
जणू त्याचे अश्रू
म्हणजे सकाळचे दव

कळतंय , समजतंय
आज हे मला
अमावसेला चांदोबा
उगवणार तरी कसा

माझ्यासाठी चांदणी
येईल तरी कशी
सुट्टीच्या दिवशी कामाला
अन् तेही बिनपगारी

माझेच शब्द माझ्यावर
हुकुमत गाजवतात
कल्पनेच्या दुनियेत सुद्धा
तिला भेटण्या पासून अडवतात

कुणाची जर असेल ‘ओळख’
तर सांगा त्या नियतीला
‘नशीब’ जरी असेल ठरलेलं
निदान स्वप्नामध्ये तरी ‘भेटू’ द्या!!!

- धनंजय चौधरी

- धनंजय चौधरी