माहीत होतं का तुला

ओठांमध्ये किती उत्सुक चुंबनं लपलेली असतात
माहीत होतं का तुला?
माहीत होतं का किती शहारे लपलेले असतात त्वचेआड
आणि तरारून उमलून येतात क्षणार्धात एका स्पर्शानं?

डोळ्यांमध्ये किती स्वप्नं असतात जांभळीनिळी
शब्दांच्या षटकोनांचं पोळं किती ओथंबलेलं असतं
किती थेंब शहद टपकत राहील तुझ्या जिभेवर
माहीत होतं का तुला?

नखांमध्ये किती शुभ्रकोवळ्या चंद्रकोरी
होत्या थांबून
स्तनांवर उगवायला चढत्या रात्री;
केसांमध्ये लपलेल्या किती गारओल्या सावल्या
तुला विसावण्यासाठी;
हे माहीत होतं कधी आधी?

माहीत होतं की उसळेल कारंजं अनाम वासांचं
श्वासांना वेडंपिसं करत?
माहीत होतं की दातलशील दाणा
तेव्हा उतू जाईल सुख?

किती रे अडाणी तू
माझ्यासारखाच
होतास
तेव्हा

कवयित्री - कविता महाजन