सुख शोधता आलं पाहिजे

आयुष्याच्या उणेपणातही,
सुख शोधता आलं पाहिजे.....
विखरून गेलं आयुष्य तरी,
तोलून सावरता आलं पाहिजे.....

जिथे दिसेल अन्याय तिथे,
पेटून उठता आलं पाहिजे.....
एखाद्याच्या अंधारलेल्या आयुष्यात,
दिवा होता आलं पाहिजे.....

भंग पावलेल्या स्वप्नांना
कवटाळून न बसता ,
नव्यानं उभं राहता आलं पाहिजे......

दगड होऊन निष्क्रिय
अमरत्व मिळवण्यापेक्षा
पणातीप्रमाणे अल्पायुषी असूनही
दुसऱ्यासाठी जळता आलं पाहिजे....

आयुष्याच्या उणेपणातही
सुख शोधता आलं पाहिजे.....

कवयित्री - कावेरी डफळ